سر بستر تڑپتا ہوں فراقِ وصلِ جاناں میں

سر بستر تڑپتا ہوں فراقِ وصلِ جاناں میں

کسی کروٹ کسی پہلو نہیں آرام ہجراں میں

یہیں مدفن بنے گا خاک ہوں گے کوئے جاناں میں

نہ جائیں گے نہ جائیں گے کبھی ہم باغِ رضواں میں

یقیں ہے بعدِ مردن بھی ہوائے کوئے جاناں میں

نسیمِ صبح ہوکر روح جائے گی گلستاں میں

خدا کے واسطے ساقی مئے گلنار جلدی دے

بہار آئی ہے سبزہ لہلہاتا ہے گلستاں میں

تعجب ہے گری بجلی نہ اس پر آہِ بلبل کی

نہ بھڑکی آتشِ گل بھی کبھی گل چیں کے داماں میں

تصور آگیا ہے جب لبِ گل رنگِ جاناں کا

ہماری آہ نے بجلی گرائی ہے بدخشاں میں

الٰہی دامنِ سفّاک تک اس کی رسائی ہو

مری مٹی نہ یوں برباد کرگنجِ شہیداں میں

برا ہو ضعف کا جب دھیان آیا چاک کا اس کے

تصور بھی الجھ کر رہ گیا تارِ گریباں میں

خلیلِ کعبۂ دل کا الٰہی تو نگہباں ہے

غضب کی آگ بھر دی ہے بتوں نے جسمِ سوزاں میں

پڑے سوتے ہیں سب احوالِ سوزِ دل نہیں کہتے

چراغِ زندگی خاموش ہے گورِ غریباں میں

سراپا چشمِ حیرت کردیا ہے تیری آمدنے

ہر اک گل ہوگیا ہے نرگسِ شہلا گلستاں میں

تصور جب کہ مضمونِ لبِ جاں بخش کا آیا

ہماری فکر نے غوطے لگائے آبِ حیواں میں

تری فرقت میں شبنم کی طرح اے غیرتِ گلشن

رلاتی ہے صدائے خندۂ گل باغِ امکاں میں

خیالِ قامتِ قاتل جب آیا سرو قد اٹھے

ہماری زندگی تو کٹ گئی تعظیمِ مہماں میں

نگاہِ شوق کی کثرت نے ایسے گل کھلائے ہیں

حنا کا رنگ بھی پِس پِس گیا ہے دستِ جاناں میں

عبث دیروحرم کی فکر میں برباد ہوتے ہو

چلو قیصرؔ رہو تم خاک بن کر کوئے جاناں میں