اک بت کافر سے الفت ہو گئی

اک بت کافر سے الفت ہو گئی

دشمنِ دیں اپنی قسمت ہو گئی

بام پر آیا جو وہ خورشید وش

فق مہہ کامل کی رنگت ہو گئی

ہجر کی شب حشر سے کچھ کم نہ تھی

صبح بھی صبح قیامت ہو گئی

دشت غربت کا ارادہ جب ہوا

رہ نما خود اپنی قسمت ہو گئی

اے غمِ دلدار اب کیا تجھ کو دوں

جان تک تو نذرِ فرقت ہو گئی

مجھ کو عصیاں لے چلے دوزخ میں جب

بیچ میں خالق کی رحمت ہو گئی

شاہؔ جب دنیا سے رخصت ہو گیے

ان کو ہر جھگڑے سے فرصت ہو گئی