جوش مستی میں نہیں ہے حاجتِ میخانہ آج

جوش مستی میں نہیں ہے حاجتِ میخانہ آج

دل مرا شیشہ ہے خود آنکھیں مری پیمانہ آج

دل کا آئینہ مرے شفاف ہو جائے اگر

بیٹھے بیٹھے دیکھ لیں ہم جلوۂ جانانہ آج

مست و بیخود سا بنا دیتی ہے ملتے ہی نگاہ

جس طرف اٹھتی ہے اس کی نرگسِ مستانہ آج

میکشو دیکھو وہ ساقی جام لے کر آ گیا

گرم و با رونق رہے گا جلسۂ رندانہ آج

کھنچ کے بڑھتی ہے مگر آکر گلے ملتی نہیں

تیغ قاتل کر رہی ہے ناز معشوقانہ آج

خیر ہے اے شاہؔ آخر جوگ تم نے کیوں لیا

مل رہے ہو منہ پہ کیوں خاکِ درِ بت خانہ آج