ہیں وہ عاشق اے خیالِ چشمِ مستِ یار ہم

ہیں وہ عاشق اے خیالِ چشمِ مستِ یار ہم

بے پئے رہتے ہیں ہر دم سر خوش و سرشار ہم

روک ہی لیتے ترے تیرِ نگہہ کا وار ہم

جانتے گر زندگی کو موت سے دشوار ہم

دورِ ساغر جانتے ہیں حلقۂ زنجیر کو

ہیں وہ دیوانے ترے اے چشم مستِ یار ہم

ہم سے دیوانے کو خوش کیا آئے گلشن کی بہار

کثرتِ داغِ جنوں سے خود ہیں جب گلزار ہم

رات دن ہوتا جمال اس شوخ کا پیش نگاہ

کاش رہتے صورتِ آئینہ اس سے چار ہم

صورتِ اشکِ فتا دہ اب تو اٹھنے کے نہیں

گر گیے یوں آنکھ سے جب آپ کی سرکار ہم

کس طرح اے شاہؔ نکلے اپنے دل سے آرزو

وہ تو ہیں پردہ نشیں، رسوا سرِ بازار ہم