زلف میں اس کی اب تو دل جا کے پھنسا جو ہو سو ہو

زلف میں اس کی اب تو دل جا کے پھنسا جو ہو سو ہو

ہم نے تو اپنے آپ لی سر پہ بلا جو ہو سو ہو

زلفِ سیہ کے دام سے دل کو رہائی جو ہوئی

چاہ ذقن میں پھر وہیں ڈوب گیا جو ہو سو ہو

دیر و حرم کو چھوڑ کر عشق کے کو میں آن کر

بار خرابیوں کا ہاں سر پہ لیا جو ہو سو ہو

گوہرِ جاں کو صرف کر مول لیا ہے دردِ دل

عشق کو غم کے واسطے چھوڑ دیا جو ہو سو ہو

غمزہ نے تیرے یک قلم لوٹ لیا مجھے صنم

مایۂ صبر دین و دل کچھ نہ بچا جو ہو سو ہو

نسخۂ عشق کا سبق ایک ہی بار جو پڑھا

آگے جو تھا پڑھا لکھا بھول گیا جو ہو سو ہو

درد ہے میرا لا دوا اس لیے دوستو تم اب

درد کی میری ڈھونڈو مت کچھ بھی دوا جو ہو سو

خطر نہیں ہے کچھ ہمیں گردشِ روزگار سے

جس کو نہ ہووے خوفِ جاں پھر اسے کیا جو ہو سو ہو

دامن شاہ خادم اب ہاتھ میں آثمؔ آ گیا

گردشِ دہر سے بس اب خوف ہی کیا جو ہو سو ہو