جل جاؤں سوزِ عشق میں لب پر فغاں نہ ہو

جل جاؤں سوزِ عشق میں لب پر فغاں نہ ہو

یوں ہڈیاں جلیں کہ ذرا بھی دھواں نہ ہو

دل میں ہزار درد ہو لب پر فغاں نہ ہو

سوزِ دروں کا حال کسی پر عیاں نہ ہو

یا رب کسی بشر کو نہ ہو ہجر کا الم

دشمن کو بھی نصیب غمِ دوستاں نہ ہو

اغیار کو تو قتل کریں آپ شوق سے

اچھا ہمارے حلق پہ خنجر رواں نہ ہو

خوں میرا رنگ لائے گا محشر میں دیکھنا

بیکس کو قتل کر کے بہت شادماں نہ ہو

کعبہ کا رخ کریں گے کلیسا کو چھوڑ کر

اے بت خدا کے واسطے تو بد گماں نہ ہو

نالہ وہی ہے کام کا تاثیر جس میں ہو

کس کام کی وہ آہ کہ جس میں دھواں نہ ہو

لینے نہ دے گا مجھ کو یہاں چین یہ کبھی

اس سر زمیں پہ جاؤں جہاں آسماں نہ ہو

محسنؔ کو اپنے قتل کیا ہے تو آپ نے

پھر دیکھ لیجیے کہیں نیم جاں نہ ہو