سناؤں کیا میں تجھے اپنے داستاں صیاد

سناؤں کیا میں تجھے اپنے داستاں صیاد

کھلی ہے کنج قفس میں مری زباں صیاد

اجاڑ بہر خدا تو نہ آشیاں صیاد

چمن میں رہنے دے کچھ تو مرا نشاں صیاد

ہمارے طائر دل کو اسیر کر پہلے

چلا ہے دام و قفس لے کے تو کہاں صیاد

اسیر میں جو ہوا باغ میں خزاں آئی

مرے ہی دم سے تھا آباد بوستاں صیاد

کبھی نہ شاد رہے ہم چمن میں وائے نصیب

غم اسیری کبھی گہہ غمِ خزاں صیاد

جہاں گیا میں مجھے کھو جتا وہاں پہنچا

مری تلاش میں پھرتا ہے ہر زماں صیاد

معینؔ جا کے خبر دے یہ بلبلوں کو تو

بہار آئی چلا سوئے بوستاں صیاد