انہیں دعویٰ کہ مجھ سا اور پیدا ہو نہیں سکتا

انہیں دعویٰ کہ مجھ سا اور پیدا ہو نہیں سکتا

مجھے دعویٰ کہ مجھ سا اور شیدا ہو نہیں سکتا

وہ قطرہ ہوں کہ حامل جس کا دریا ہو نہیں سکتا

وہ دریا ہوں کہ ہر گز قطرہ قطرہ ہو نہیں سکتا

بنائے جس کو تو یا رب وہ کیا کچھ بن نہیں سکتا

سکھائے جس کو تو پھر اس سے کیا کیا ہو نہیں سکتا

میں تیرا مظہر کامل ہوں لیکن اس کے کیا معنیٰ

تو جو چاہے وہ ہو پر میرا چاہا ہو نہیں سکتا

مری تصویر تو ہے تو اگر پردے کرے کرلے

تری تصویر میں ہوں مجھ سے پردہ ہو نہیں سکتا

احد خود بن کے احمدؐ میم کے پردہ میں بول اٹھا

یہ وہ پردہ ہے جس میں مجھ سے پردہ ہو نہیں سکتا

محمدؐ بن کے احمدؐ بن احد بن چاہے جو کچھ بن

مگر چشمِ حقیقت بیں کو دھوکا ہو نہیں سکتا

قدم نے اور عدم نے مجھ کو کس جھگڑے میں ڈالا ہے

رہا جاتا نہیں بے پردہ پردہ ہو نہیں سکتا

خدا سے ہو کے واصل شوق سے پھر تو خدائی کر

خدا مت بن خدا بن کر خدا کا ہو نہیں سکتا

نہ مجھ کو نیست کا خطرہ نہ مجھ کو بود کا کھٹکا

میں وہ شے ہوں کہ لاشئےکا اشارہ ہو نہیں سکتا

ترا میکش ترا محتاج ہے اےساقئ باقی

ترا میخوار وقف جام و مینا ہو نہیں سکتا

جہاں حیرت ہی حیرت ہو وہاں کیا کر سکے کوئی

جہاں قدرت ہی قدرت ہو وہاں کیا ہو نہیں سکتا

ہے تو میری تمنا اورمیں ہوں آرزو تیری

تو پھر یہ کیوں کہ تو مجھ سا میں تجھ سا ہو نہیں سکتا

مآل بیخودی ہم تو خدا بیتی سمجھتے ہیں

مگر زاہد یہ کہتا ہے کہ ایسا ہو نہیں سکتا

کدھر ہے او خیالِ خام وا کر چشمِ عبرت کو

جو پیدا کرنےوالا ہے وہ پیدا ہو نہیں سکتا

گماں عین الیقین بن کر یقیں حق الیقیں ہو کر

قسم کھا کر یہ کہتے ہیں کہ تم سا ہو نہیں سکتا

رہے گا اللہ اللہ کا اگر دل میں ترے کھٹکا

تو پھر تجھ کو مری جاں کوئی کھٹکا ہو نہیں سکتا

مریض عشق کا کیا یہ مداوا ہو نہیں سکتا

تم اپنے منہ سے یہ کہہ دو کہ اچھا ہو نہیں سکتا

ہماری داستانِ درد دل سن کر وہ یوں بولے

ہمارے دل میں اس سے درد پیدا ہو نہیں سکتا

کلام اللہ میں حم لکھ کر یہ بتانا تھا

تری زلفوں کا اس سے بڑھ کے طغریٰ ہو نہیں سکتا

ولی ہر حال میں اپنے خدا کا فضل شامل ہے

ہمارا دشمنوں سے بال بیکا ہو نہیں سکتا