تم اور کہیں عاشقِ دیوانہ کہیں اور

تم اور کہیں عاشقِ دیوانہ کہیں اور

اف شمع کہیں اور ہے پیمانہ کہیں اور

پی کر جسے ہر دم رہے مخمور ابد تک

وہ مے ہے کہیں اور وہ میخانہ کہیں اور

گھبراگیا دل عالمِ ہستی و عدم سے

لے چل مجھے اے جلوۂ جانانہ کہیں اور

اے شیخ بجز عرش کے بے عرش نشیں کے

ہوتی ہی نہیں محفلِ رندانہ کہیں اور

اے حسنِ ازل طاقتِ گفتار عطا کر

کہنا ہے مجھے عشق کا افسانہ کہیں اور

میدانِ محبت کے سوا حضرتِ واعظ

کیوں صرف کروں ہمت مردانہ کہیں اور

اے جانِ جہاں اک دلِ عاشق کے سوا آپ

دیکھیں تو بنا لیجئے کا شانہ کہیں اور

پتھر پڑیں واعظ کی سمجھ پر وہ یہ سمجھا

کعبہ ہے کہیں اور صنم خانہ کہیں اور

یاں عالمِ اسباب میں تم چاہو سو کہہ لو

جتلائیں گے ہم رسمِ قدیمانہ کہیں اور

اک دائرۂ لا کا اک الا کا ہے پابند

دیوانہ کہیں اور ہے فرزانہ کہیں اور

ساقی نے مجھے دیکھ کے فرمایا کہ تم کو

لے جائیگی یہ لغزشِ مستانہ کہیں اور

دیکھا ہے ولیؔ طور پہ ہم نے یہ تماشا

جانباز کہیں اور ہے جانانہ کہیں اور