Tuk samajh kar to lagao lat han bahr-e-KHuda

Tuk samajh kar to lagāo laat haañ bahr-e-ḳhudā

ye kunisht dil hai dekho ai butāñ bahr-e-ḳhudā

baaġh meñ gir mar bhī jā۔ūñ is qad mauzūñ ko dekh

rakhiyo zer-e-sarv mujh ko bāġhbāñ bahr-e-ḳhudā

ek ham bhī haiñ tire halqa-ba-goshoñ meñ yahāñ

phir na jaanā ham se ai abrū-kamāñ bahr-e-ḳhudā

ruḳh pe har sūrat se rakhnā gul-ruḳhāñ ḳhat kā hai kufr

dekho qur.āñ par na rakhiyo bostāñ bahr-e-ḳhudā

do qadam par rah ga.ī hai manzil-e-maqsūd aah

chhoḌ kar tanhā na jaao ham-rahāñ bahr-e-ḳhudā

ḳhāna-e-chashm us ke sab rahne kī ḳhātir chhoḌ do

dīda-o-dānista uThiyo mardumāñ bahar-e-ḳhudā

nāma-e-laḳht-e-dil us be-dīd tak pahuñchā mirā

aaj phir ai qāsid-e-ashk-e-ravāñ bahar-e-ḳhudā

abrū-o-mizhgāñ se us ke is qadar kāvish na kar

ik ḳhadañg-e-āh se ai dil yahāñ bahar-e-ḳhudā

ḳhanjar-o-shamshīr tak naubat na pahuñchā jañg kī

sulh kā mazkūr lā ab darmiyāñ bahar-e-ḳhudā

kab bin us ārām-e-jāñ ke jī ko yaañ aatā hai chain

le chal ai betābī-e-dil phir vahāñ bahar-e-ḳhudā

ban gayā dil hī nishāna aah par tū ne na kī

nāvak-e-mizhgāñ se thī ḳhātir-nishāñ bahr-e-ḳhudā

fikr-e-zād-e-rāh hai kuchh tujh ko bhī haañ ai 'nasīr'

umr ko ġhaflat meñ mat kho rā.egāñ bahr-e-ḳhudā

Tuk samajh kar to lagao lat han bahr-e-KHuda

ye kunisht dil hai dekho ai butan bahr-e-KHuda

bagh mein gir mar bhi ja۔un is qad mauzun ko dekh

rakhiyo zer-e-sarw mujh ko baghban bahr-e-KHuda

ek hum bhi hain tere halqa-ba-goshon mein yahan

phir na jaana hum se ai abru-kaman bahr-e-KHuda

ruKH pe har surat se rakhna gul-ruKHan KHat ka hai kufr

dekho quran par na rakhiyo bostan bahr-e-KHuda

do qadam par rah gai hai manzil-e-maqsud aah

chhoD kar tanha na jao ham-rahan bahr-e-KHuda

KHana-e-chashm us ke sab rahne ki KHatir chhoD do

dida-o-danista uThiyo marduman bahar-e-KHuda

nama-e-laKHt-e-dil us be-did tak pahuncha mera

aaj phir ai qasid-e-ashk-e-rawan bahar-e-KHuda

abru-o-mizhgan se us ke is qadar kawish na kar

ek KHadang-e-ah se ai dil yahan bahar-e-KHuda

KHanjar-o-shamshir tak naubat na pahuncha jang ki

sulh ka mazkur la ab darmiyan bahar-e-KHuda

kab bin us aaram-e-jaan ke ji ko yan aata hai chain

le chal ai betabi-e-dil phir wahan bahar-e-KHuda

ban gaya dil hi nishana aah par tu ne na ki

nawak-e-mizhgan se thi KHatir-nishan bahr-e-KHuda

fikr-e-zad-e-rah hai kuchh tujh ko bhi han ai 'nasir'

umr ko ghaflat mein mat kho raegan bahr-e-KHuda