itna na fareb-e-ulfat mein ye jazba-e-kaamil aa jae

itnā na fareb-e-ulfat meñ ye jazba-e-kāmil aa jaa.e

har gaam qarīb-e-manzil ho har gaam pe manzil aa jaa.e

jalvoñ kī numā.ish hai us meñ ḳhud un kī rihā.ish hai us meñ

ab vādī-e-aiman se kah do is dil ke muqābil aa jaa.e

itnī to 'atā ho jāneñ itne to 'atā hoñ dil mujh ko

har naaz pe ik jaañ qurbāñ ho har ġhamze pe ik dil aa jaa.e

ye terī nazar kī rañgīnī ye tere qadam kī rā'nā.ī

jis rañg pe saaqī tū chāhe us rañg pe mahfil aa jaa.e

be-dād mohabbat kā ai dil mahshar meñ mazā aa jā.egā

ik samt se maiñ huuñ dād-talab ik samt se qātil aa jaa.e

ai ḳhizr kisī ne duniyā meñ aisā bhī safīna dekhā hai

har mauj se sāhil paidā ho har mauj meñ sāhil aa jaa.e

ai 'ishq kī vus'at kyā kahnā ai shauq-e-shahādat kyā kahnā

‘qātil’ hī taḌap kar maqtal meñ ḳhud sūrat-e-bismil aa jaa.e

itna na fareb-e-ulfat mein ye jazba-e-kaamil aa jae

har gam qarib-e-manzil ho har gam pe manzil aa jae

jalwon ki numaish hai us mein KHud un ki rihaish hai us mein

ab wadi-e-aiman se kah do is dil ke muqabil aa jae

itni to 'ata ho jaanen itne to 'ata hon dil mujh ko

har naz pe ek jaan qurban ho har ghamze pe ek dil aa jae

ye teri nazar ki rangini ye tere qadam ki ra'nai

jis rang pe saqi tu chahe us rang pe mahfil aa jae

be-dad mohabbat ka ai dil mahshar mein maza aa jaega

ek samt se main hun dad-talab ek samt se qatil aa jae

ai KHizr kisi ne duniya mein aisa bhi safina dekha hai

har mauj se sahil paida ho har mauj mein sahil aa jae

ai 'ishq ki wus'at kya kahna ai shauq-e-shahadat kya kahna

‘qatil’ hi taDap kar maqtal mein KHud surat-e-bismil aa jae