اتنا نہ فریب الفت میں یہ جذبۂ کامل آ جائے

اتنا نہ فریب الفت میں یہ جذبۂ کامل آ جائے

ہر گام قریب منزل ہو ہر گام پہ منزل آ جائے

جلووں کی نمائش ہے اس میں خود ان کی رہائش ہے اس میں

اب وادیٔ ایمن سے کہہ دو اس دل کے مقابل آ جائے

اتنی تو عطا ہو جانیں اتنے تو عطا ہوں دل مجھ کو

ہر ناز پہ اک جاں قرباں ہو ہر غمزے پہ اک دل آ جائے

یہ تیری نظر کی رنگینی یہ تیرے قدم کی رعنائی

جس رنگ پہ ساقی تو چاہے اس رنگ پہ محفل آ جائے

بیداد محبت کا اے دل محشر میں مزا آ جائے گا

اک سمت سے میں ہوں داد طلب اک سمت سے قاتل آ جائے

اے خضر کسی نے دنیا میں ایسا بھی سفینہ دیکھا ہے

ہر موج سے ساحل پیدا ہو ہر موج میں ساحل آ جائے

اے عشق کی وسعت کیا کہنا اے شوق شہادت کیا کہنا

قاتلؔ ہی تڑپ کر مقتل میں خود صورت بسمل آ جائے