faza badli hui thi aalam-e-hasti ke gulshan ki

fazā badlī huī thī 'ālam-e-hastī ke gulshan kī

mujhe jab hosh meñ lā.īñ havā.eñ un ke dāman kī

koī mere sivā samjhā na ramz us chashm-e-pur-fan kī

hamesha kashmakash chaltī rahī shaiḳh-o-barhaman kī

bachchī jo bijliyoñ ke baad ḳhākistar vo baaqī thī

koī hai.at na thī mere nasheman meñ nasheman kī

ilāhī kaun vo mahv-e-ḳhirām-e-nāz hai jis se

fazā.eñ mast hotī jā rahī haiñ aaj gulshan kī

kisī sūrat nahīñ khultā guloñ kā raaz bulbul par

khulī hai aañkh nargis kī zabāñ hai band sosan kī

na ho shāmil agar husn-e-nazara-soz kī fitrat

kareñgī ḳhud hifāzat bijliyāñ mere nasheman kī

baḌhī haiñ nāḳhun vahshat kī chīra dastiyāñ itnī

garebāñ purze purze ho chukā ab ḳhair dāman kī

mirī turbat pe yārab kaun ye mahshar ḳhirām aayā

ki miTTī ḳhud-baḳhud uḌne lagī hai mere madfan kī

vafāoñ meñ to ai 'qātil' nahīñ fariyād kī vus'at

nikālo ab na.ī tarz-e-fuġhāñ nāloñ ke shevan kī

faza badli hui thi 'alam-e-hasti ke gulshan ki

mujhe jab hosh mein lain hawaen un ke daman ki

koi mere siwa samjha na ramz us chashm-e-pur-fan ki

hamesha kashmakash chalti rahi shaiKH-o-barhaman ki

bachchi jo bijliyon ke baad KHakistar wo baqi thi

koi haiat na thi mere nasheman mein nasheman ki

ilahi kaun wo mahw-e-KHiram-e-naz hai jis se

fazaen mast hoti ja rahi hain aaj gulshan ki

kisi surat nahin khulta gulon ka raaz bulbul par

khuli hai aankh nargis ki zaban hai band sosan ki

na ho shamil agar husn-e-nazara-soz ki fitrat

karengi KHud hifazat bijliyan mere nasheman ki

baDhi hain naKHun wahshat ki chira dastiyan itni

gareban purze purze ho chuka ab KHair daman ki

meri turbat pe yarab kaun ye mahshar KHiram aaya

ki miTTi KHud-baKHud uDne lagi hai mere madfan ki

wafaon mein to ai 'qatil' nahin fariyaad ki wus'at

nikalo ab nai tarz-e-fughan nalon ke shewan ki