مونس وہمدم رفیق ومہرباں کوئی نہیں

مونس وہمدم رفیق ومہرباں کوئی نہیں

پہلوے بسمل میں وقت امتحاں کوئی نہیں

آپ کے بیمار غم کا ہجر میں تیمار دار

یاس وحرماں کے سوا اے جان جاں کوئی نہیں

دل میں کس کی جستجو ہے اے نگاہ ناز یار

ایک تیری آرزو ہے اور یہاں کوئی نہیں

موت کی تلخی پہ غالب لذت گفتار ہے

آپ سا شیریں سخن شیریں زباں کوئی نہیں

چند تصویریں کسی کی دیکھتا ہوں باربار

اے تصور آج مجھ سا شادماں کوئی نہیں

بے طلب بہر تشفی دونوں آتے ہیں شمیمؔ

درد ہو یا غم ہو ان سا مہرباں کوئی نہیں