آندھی جو تھی شباب کی سر سے گذر گئی

آندھی جو تھی شباب کی سر سے گذر گئی

حیرت میں ہوں کہ میری جوانی کدھر گئی

بیتاب ہو کے اس نے گلے سے لگالیا

میری نگاہ یاس بھی کیا کام کر گئی

چھاجائے گی جہاں میں گھٹا انتشار کی

جس وقت ان کی زلفِ معنبر بکھر گئی

وہ اضطراب قلب کی حالت نہیں رہی

آتے ہی ان کے میری طبیعت ٹھہر گئی

کیا تیرافگنی کا ارادہ نہیں رہا

کیسی چڑھی کمان تھی کیسی اتر گئی

مارا ادا نے اس کی مگر پوچھتا ہے کون

آئی گئی شمیم محبت کے سر گئی