ترے رنگ ہیں جلوہ گر کیسے کیسے
گل و نخل و برگ و ثمر کیسے کیسے
تو ہی نے ہیں پیدا کیے بحر و بر میں
زر و سیم و لعل و گہر کیسے کیسے
گیا عرش پر کوئی چوتھے فلک پر
ہوئے اہل رفعت بشر کیسے کیسے
شرح وید و قرآں کی کیا کیا لکھی ہے
بشر کو دیے ہیں ہنر کیسے کیسے
کہیں شکل آدم کہیں شکل احمد
ترے رنگ ہیں جلوہ گر کیسے کیسے
خودی میں نہ پایا کسی نے خدا کو
پھرے عمر بھر در بدر کیسے کیسے
مقام محمد کو تحقیق کر کے
ہوئے فقر میں شیر نر کیسے کیسے
مٹے خود مگر تجھ کو وہ ڈھونڈ لائے
ہوئے عشق میں با خبر کیسے کیسے
تری شان ہے کیا جمالی جلالی
نمایاں ہیں شمسؔ و قمر کیسے کیسے
مأخذ :
- کتاب : آئینۂ اسرار معرفت (Pg. 64)
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
