tujhi ko sochte har-pal tujhi se guftugu karte

tujhī ko sochte har-pal tujhī se guftugū karte

jo ik umr aur mil jaatī tirī hī aarzū karte

tire dil ko qarār aatā hai jo tash.hīr-e-ulfat se

tū apne ishq kā charchā har ik se kū-ba-kū karte

tumhār is amal se dil shikasta ho gayā huuñ maiñ

agar shikvā hī karnā thā to mere rū-ba-rū karte

tumhār vāste dil meñ aqīdat jo nahīñ hotī

tumhār naam kā ta.avīz kyuuñ zeb-e-gulū karte

ham apnī ruuh ko dhote rahe ashk-e-nadāmat se

ki us kā sāmnā kaise bhalā ham be-vuzū karte

sabhī kī ḳhvāhishoñ kā paas jab rakhā gayā hai tū

qabāhat kyā thī us meñ jo hameñ bhī surkH-rū karte

muyassar hī nahīñ aa.ī kabhī ai 'shād' tanhā.ī

vagarna ḳhud se jī bhar ke kisī din guftugū karte

tujhi ko sochte har-pal tujhi se guftugu karte

jo ek umr aur mil jati teri hi aarzu karte

tere dil ko qarar aata hai jo tashhir-e-ulfat se

tu apne ishq ka charcha har ek se ku-ba-ku karte

tumhaar is amal se dil shikasta ho gaya hun main

agar shikwa hi karna tha to mere ru-ba-ru karte

tumhaar waste dil mein aqidat jo nahin hoti

tumhaar nam ka tawiz kyun zeb-e-gulu karte

hum apni ruh ko dhote rahe ashk-e-nadamat se

ki us ka samna kaise bhala hum be-wuzu karte

sabhi ki KHwahishon ka pas jab rakha gaya hai tu

qabahat kya thi us mein jo hamein bhi surkH-ru karte

muyassar hi nahin aai kabhi ai 'shad' tanhai

wagarna KHud se ji bhar ke kisi din guftugu karte