پتا نہ گل کا ہے میرے نہ ہے نشاں صیاد

پتا نہ گل کا ہے میرے نہ ہے نشاں صیاد

نظر میں کیسے ہو خار بوستاں صیاد

ہمیں نہ بند قفس کر کہ ایک مدت سے

ہے دل میں آتش فرقت مرے نہاں صیاد

ستم جو کرتا ہے یوں مجھ سے تو اسیروں پر

کہیں نہ ٹوٹ پڑے تجھ پہ آسماں صیاد

ادب ہے مانع اظہار رازہائے دروں

وگرنہ کہتے محبت کی داستاں صیاد

غرور بلبل ناداں عبث ہے گلشن پر

ضرور بدلے گی رنگ ایک دن خزاں صیاد

ہمارا طائر دل لے کے آشیاں لوٹا

تمہیں تمہارا مبارک ہو بوستاں صیاد

قرار ہستی دو روزہ کو نہیں ہے شمسؔ

ہے اپنی گھات میں ہر لحظہ ہر زماں صیاد