اس مسیحا نے جو بالا کی نظر

اس مسیحا نے جو بالا کی نظر

نیم جانوں نے وہیں وا کی نظر

چرخ پر جب تونے بالا کی نظر

گردشیں سو سو دکھایا کی نظر

جب سے ہے تیرا تجلی گاہ دل

سوئے دل ہے طور موسیٰ کی نظر

دیکھ کر دانتوں کی تیرے وہ چمک

برق کی ہر آن چمکا کی نظر

شوق میں صیاد کے مانند صید

حلقۂ دیدہ میں تڑپا کی نظر

چشم فتاں کی نگاہ تیز سے

خاک کی ہے مول شہلا کی نظر

دیکھ کر زاہد کا تقویٰ بزم میں

چل گئی یاروں میں ایما کی نظر

تیری رقاصی کا غل ہے چرخ پر

دوختہ ہے تجھ پہ زہرہ کی نظر