دور اتنا آپ کو مجھ سے نہ اے خونخوار کھینچ

دور اتنا آپ کو مجھ سے نہ اے خونخوار کھینچ

میں ہوں سر دینے کے کو حاضر شوق سے تلوار کھینچ

راست گو ہوں عاشقِ صادق ترا الحق ہوں میں

دار پر منصور کی صورت مجھے اے یار کھینچ

آئی پھر فصل بہاری پھر جنوں کا جوش ہے

وحشت دل لے چلی پھر جانب کہسار کھینچ

ساتھ ہی اس کے نکل آئے گی میری جان زار

میرے سینہ سے نہ اے جراح تو سو فار کھینچ

کچھ تو لینے دے پناہ آفت زدہ عشاق کو

اپنا سایہ دور اتنا تو نہ اے دیوار کھینچ

اے زلیخا ہے یہ آداب محبت سے بعید

شہر کنعاں سے نہ یوسف کو سرِ بازار کھینچ

دشمن دیں بے طرح احمدؔ کا ہے نفس لعیں

ذوالفقار اپنی خدا را حیدر کرار کھینچ