آیا جو ہمارے یہاں وہ ماہ جبیں آج

آیا جو ہمارے یہاں وہ ماہ جبیں آج

ہے نور سے معمور مرے گھر کی زمیں آج

یا آکے ملے مجھ سے مرا ماہ جبیں آج

یا آسماں کردے مجھے پیوند زمیں آج

دل سے مرے نالہ جو نکل آئے کہیں آج

ہل جائے ابھی کنگرۂ عرش بریں آج

ہوتے ہیں وہ ہر بات پہ کیوں چیں بچیں آج

بہکایا تو اغیاروں نے پھر ان کو نہیں آج

تاثیر جو دکھلائے مری آہ کہیں آج

پردہ سے نکل آئے ابھی پردہ نشیں آج

میں درد جدائی سے تھا مرنے کے قریں آج

پاتے نہ کبھی مجھ کو جو تم آتے نہیں آج

کیا غم تمہیں احمدؔ ہے جو بیٹھے ہو حزیں آج

اس بت کا خیال آگیا پھر تو نہ کہیں آج