آہیں یہ ہوں زمیں تہہ و بالا ہوا کرے

آہیں یہ ہوں زمیں تہہ و بالا ہوا کرے

نالہ وہ ہو فلک پہ جو محشر بپا کرے

کہتے ہیں آپ پا کے ہمیں کوئی کیا کرے

آئیں تو آپ بس میں ہمارے خدا کرے

آیا خیال اور بلا سر پہ جھک پڑی

کس طرح کوئی الفتِ زلفِ دوتا کر ے

فصلِ بہار فصلِ خزاں ایک ہے ہمیں

ہم ہیں قفس میں بند کہیں کچھ ہوا کرے

حالت ہماری دیکھ کے کہتے ہیں اقربا

اس کو خدا پہ چھوڑو جو چاہے خدا کرے

ساقی ہے مئے ہے باغ ہے مطرب ہے یار ہے

کالی گھٹا بھی جھوم کے آئے خدا کرے

صورت کو میری دیکھ کے ہنستے ہو میری جاں

تم بھی کسی پہ ہو یونہی عاشق خدا کرے

قبضہ بتوں کا خانۂ کعبہ پہ ہے غضب

نکلیں خدا کے گھر سے کہیں یہ خدا کرے

اندھیر ہے غضب ہے کہ اس شمع حسن سے

روشن عدو کا گھر ہو مرا دل جلا کرے

آنے کا وعدہ اس نے کیا ہےہزار شکر

اللہ میرے جذبۂ دل کا بھلا کرے

ترچھی نظر سے آج تو تیور خراب ہیں

ابرو پہ بل ہے دیکھیے جلاد کیا کرے

دل نے انہیں کا ساتھ دیا جا کے رہ گیا

کیا ظلم ہے کسے کوئی اب رہنما کرے

اللہ رے میری زندگی بھاری یہ ان پہ ہے

میں نے کہا کہ مرتا ہوں بولے خدا کرے

اللہ رے پوچھتے ہیں وہ مجھ سے کہ اے شررؔ

ہم بس میں آئیں تیرے تو بتلا دے کیا کرے