وہ آنکھ کور ہو جو برائی تکا کرے

وہ آنکھ کور ہو جو برائی تکا کرے

ہو گنگ وہ زبان جو شکوا ترا کرے

اے بے نیاز واہ تری کیا ہی شان ہے

چاہے جو تو تو پل میں ابھی کیا سے کیا کرے

ارمان بھی ہے پہنچوں مدینہ کسی طرح

بر آئے میرے دل کی تمنا خدا کرے

ہمت یہ کہہ رہی ہے دلِ ناصبور سے

راضی تو رہ اسی پہ جو چاہے خدا کرے

قابو میں جاکے یار کے جو اس کا ہورہے

باز آئے ایسے دل سے نہ انساں تو کیا کرے

پہلو میں دل نہیں ہے خدا جانے کیا ہوا

مل جائے گم شدہ مرا یوسف خدا کرے

کوئے صنم میں دفن ہو لاشہ کہیں مرا

مٹی مری ٹھکانے لگے کبریا کرے

حسرت کا غم کا رنج کا حرماں کا یاس کا

کس کس کا سوگ ایک دلِ مبتلا کرے

کب میں نے کی شکایتیں اور کس کے سامنے

کس نے کہا ہے اس سے کہو سامنا کرے

سودا نہ مول لے دلِ بیمار عشق کا

الجھے نہ ان کی زلف رسا میں خدا کرے

وہ لے گئے ہیں شیفتہؔ دل میرا چھین کر

ان کا بھی ہو نہ یہ دلِ مضطر خدا کرے