لذتِ عیش جناں ہے جس کا زاہد کو نشا

لذتِ عیش جناں ہے جس کا زاہد کو نشا

جانتا ہوں دُر دہے جام مے دیدار کا

باغ جنت جس کی تو کرتا ہے تعریف اس قدر

ہے وہ اک گلدستہ واعظ بزم وصل یار کا

ذات مطلق کی پرستش ہوتی ہے ہر رنگ میں

بندگی کی قید ہے یہ باندھنا زنار کا

صلح کر دے اے حقیقت تو ہی آکر درمیاں

بڑھ گیا ہے حد سے جھگڑا کافرو دیندار کا

شیخ کی صحبت سے اس نوبت کو پہنچے ہیں کہ اب

توڑتے ہیں دیر میں بت خانہ ہم پندار کا

باپ ماں سے تو زیادہ مہرباں ہے اے کریم

ڈر بہت ہے ہم کو اپنی شوخیٔ گفتار کا

ہوں بڑا عاصی خدایا رکھیو رحمت کی نظر

خاتمہ بالخیر کیجؤ صوفیؔ بدکار کا