دشت کے دشت اشکوں سے تر ہو گئے

دشت کے دشت اشکوں سے تر ہو گئے

سارے ذرات لعل و گہر ہو گئے

سائباں تھے مگر مل نہ پائے ہمیں

عمر کی راہ پر در بہ در ہو گئے

حادثہ یہ ہوا ہم چلے تو مگر

آپ تک آتے آتے خبر ہو گئے

جانے کیا کر دیا اک نظر نے تیری

میرے جذبات زیر و زبر ہو گئے

صبر سے میرے ہارا تیرا ظلم پھر

دیکھ صیاد پھر بال و پر ہو گئے

اپنے دو چار لمحے بنے داستاں

پھر فسانے سبھی مختصر ہو گئے

میں نے چپکے سے دم کیں دعائیں مگر

وہ شفا پا گئے مشتہر ہو گئے

اس کے قدموں کا یوں جھک کے بوسہ لیا

خاک پا ہم سر رہگزر ہو گئے

آپ کوثرؔ کی آنکھوں کا تارا ہوئے

دل میں ابھرے تو رشک قمر ہو گئے