حالت ہے وہی شام سے پھر درد جگر کی

حالت ہے وہی شام سے پھر درد جگر کی

امید نہیں آج تو ہم کو بھی سحر کی

اللہ رے نزاکت کہ دم بندش مضموں

تارِ رگِ اندیشہ ہے تشبیہ کمر کی

پیغام اجل تھی خلش جنبش منقار

بسمل ہوئے سنتے ہی اذاں مرغ سحر کی

لیجائے نہ پیغام نہ بو زلف کی لائے

اے باد صبا تو نہ ادھر کی نہ ادھر کی

اے موج ہوا خوب نکالیں گے ترا بل

وہ زلف اگر بال برابر کہیں سر کی

مانا کہ وہ کل صبح کو پھر آئیں گے لیکن

امید کسے ہے شب فرقت میں سحر کی

جب ہاتھ وہ رکھتے ہیں سنبھل جاتے ہیں دونوں

حالت انھیں دکھلایئے کیا قلب و جگر کی

الماس ہیں یہ بہر جگر کا وی عشاق

تشبیہ ہے بیجا ترے دانتوں سے گہر کی

خاموشی لب میں بھی تکلم کا مزا ہے

کیا بات ہے واللہ بت رشک قمر کی

مدفن ہو مرا کوچۂ جاناں میں عزیزو

مر کر بھی تمنا ہے اسی راہ گذر کی

ہر برگ شجر وجد میں ہے گل ہیں شگفتہ

کیا زمزمہ پردازی ہے عرفان سحر کی

افسوس دم مرگ رہی حسرت دیدار

آئے وہ مگر ان کو کسی نے نہ خبر کی

سچ ہے یہ سخن ؔمصرع بر جسہک شاعر

پتھر میں بھی ہوجاتی ہے تاثیر نظر کی