چمن میں کس کی آمد ہے صبا جو روح پرور ہے

چمن میں کس کی آمد ہے صبا جو روح پرور ہے

شمیم نکہت گل سے دماغ جاں معطر ہے

قلق ہے درد ہے رنج والم ہے ہجر دلبر ہے

نیا اک روز صدمہ الفت جاناں میں دلبر ہے

متاع جاں یہاں غرق سر شک دیدۂ تر ہے

تری برق تبسم خرمنِ جان عدو پر ہے

مداوا کیا کرے کوئی دل بیتاب کا میرے

کہ جودلسوز ہے میرا زیادہ مجھ سے مضطر ہے

حقیقت جس سے کہتا ہوں میں وہ کہتا ہے گھبرا کر

ترا افسانۂ غم بے تکلف اک دفتر ہے

کسی کو بیوفا الفت پہ تیری کیا بھروسا ہو

عنایت مہربانی لطف جو کچھ ہے وہ دم بھر ہے

کوئی سیکھے اگر جادو تو اس کی آنکھ سے سیکھے

سبق آموز سحر سامری چشم فسونگر ہے

یہ مجھ سے بیکسی کہتی ہے میرے دل کے جانے پر

ابھی روتے ہو کیا اس کا تو رونا زندگی بھر ہے

خیال اس کا رہے ہر دم کہ لگ جائے نہ ٹھیس اس کو

تیرا مینائے مے ساقی مجھے دل کے برابر ہے

حساب جرم الفت میں عذاب ہجر جاناں میں

شب فرقت ہماری روز محشر کے برابر ہے

مزا ملتا ہے خوب ان کے لب شیریں کے بوسوں میں

اور اس پر گالیوں سے لذت قند مکرر ہے

ترقی کی وہ حسن جانستاں نے اس کے عالم میں

کہ وہ ظالم بھی ہے تو ظالموں میں سب سے بڑھ کر ہے

جفائیں لاکھ ہوں لیکن حضور داورِ محشر

شکایت اور تمہاری میں کروں یہ تم کو باور ہے

تعجب کیا جو میں جوش جنوں میں خون روتا ہوں

کہ یادِ جنبش مژگان قاتل مجھ کو نشتر ہے

مزا بتلائیں کیا اے خضر تم کو مرگ الفت کا

رہے تم یوں ہی یہ لذت کہاں تم کو میسر ہے

بجا ہے تجھ کو اے جان جہاں دعوائے یکتائی

زمانے میں نہ ہوگا کوئی جیسا تو ستمگر ہے

تڑپ کر ہمدمو !کل رات بھر رویا ہوں فرقت میں

برنگِ موج دریا ہر شکن بالائے بستر ہے

وفا اور جور میں ہم اور تم دونوں ہی نامی ہیں

نہ مجھ سا اب ستمکش ہے نہ تم سا اب ستمگر ہے

نہ ہوتے کاش صورت آشنا ہم اس ستمگرسے

سنا ہے غیر کی باتوں کے سننے کا وہ خوگر ہے

غضب ہے یہ مجھے وہ راز دار اپنا سمجھتے ہیں

شکایت غیر کی مجھ سے زبان پر ان کی شب بھر ہے

رہےگا یاد کیونکر شکوۂ جور و ستم اس کا

خدا جانے کہ مرنے پر ہے یا کب روز محشر ہے

نہیں موقوف آئینہ پہ ہم تو یہ سمجھتے ہیں

جسےتو دیکھ لے وہ وقت کا اپنے سکندر ہے

سنا ہے بعد رنجش عشق میں ملتی ہے آسائش

خفا ہو کر ذرا تم ہم سے مل جاؤ تو بہتر ہے

لگادی آگ اس کافر نے میرے خرمنِ جاں میں

ذرا سا پر تو برقِ نگاہِ یار دل پر ہے

ترے ضبط فغاں نے اے سخنؔ رسوا کیا تجھ کو

برا گر آہ و نالہ تھا خموشی اس سے بد تر ہے