کبھی تو دل مرا بھی شاد کرنا

کبھی تو دل مرا بھی شاد کرنا

اگر بھولے ہوؤں کو یاد کرنا

رہائی دو اسیرانِ بلا کو

ہمیں لیکن نہ تم آزاد کرنا

نہ آئے گا کبھی وہ بر سر مہر

عبث ہے نالہ و فریاد کرنا

کیا عاجز بہت وحشت نے مجھ کو

جنوں میری ذرا امداد کرنا

چلو میرے ہی اوپر خیر گذری

کسی پر یوں نہ پھر بیداد کرنا

دلاتے رہنا اپنی یاد ہم کو

نہ ہوں جب ہم تو ہم کو یاد کرنا

مرے پر بھی سخنؔ کو تا قیامت

نہ بھولے گا ترا بیداد کرنا