عشرت و آرام و راحت سے ہوئے بیزار ہم

عشرت و آرام و راحت سے ہوئے بیزار ہم

غم ہمارا دوست غم کے ہوگئے غمخوار ہم

پائی ہے جب سے اجازت طوف کوئے یار کی

آپ اپنے ہوگئے ہیں والہ رفتار ہم

سست ہیں لیکن نہیں ہے ظاہرا کوئی مرض

تیری آنکھوں کی طرح برسوں سے ہیں بیمار ہم

نیم باز آنکھوں کا تیری خواب میں بھی ہے خیال

آج کل رکھتے ہیں اے جاں طالعِ بیدار ہم

یہ سنا کر ٹال دیتے ہیں دلِ مشتاق کو

حشر میں دکھلائیں گے اس کو تجھے دیدار ہم

بن کے شکل یاس سارے دن ڈراتی ہے مجھے

رات کو رہتے ہیں جس امید پر بیدار ہم

اپنے ہی دل کو کہ تیرے حسن کا آئینہ ہے

کرتے ہیں اے جاں شب فرقت میں کیا کیا پیار ہم