hijrat kar ke wapas aana itna bhi aasan nahin

hijrat kar ke vāpas aanā itnā bhī āsān nahīñ

roz bikharnā roz sañvarnā itnā bhī āsān nahīñ

tund havā meñ diye kā jalnā itnā bhī āsān nahīñ

qatra-qatra roz pighalnā itnā bhī āsān nahīñ

kitne hī be-rahm shikārī ghaat lagā.e baiThe haiñ

āñgan meñ chiḌiyoñ kā chahaknā itnā bhī āsān nahīñ

zaḳhm hare ho hī jaate haiñ chāhe jitne jatan karo

udhḌe zaḳhm kā vāpas silnā itnā bhī āsān nahīñ

paañv chhalnī ho jaate haiñ kitne mausam kho jaate haiñ

band galī se vāpas muḌnā itnā bhī āsān nahīñ

kaḌī riyāzat chāhiye is meñ mat samjho tum sahl ise

aaj ke daur meñ insāñ honā itnā bhī āsān nahīñ

kirchī-kirchī zaat kā shīsha por se chunñā paḌtā hai

apne aap se roz ulajhnā itnā bhī āsān nahīñ

bahr-e-talab meñ Duub ke ubhro raaz nihāñ tab khultā hai

ruuh se dil kā rishta juḌnā itnā bhī āsān nahīñ

hijrat kar ke wapas aana itna bhi aasan nahin

roz bikharna roz sanwarna itna bhi aasan nahin

tund hawa mein diye ka jalna itna bhi aasan nahin

qatra-qatra roz pighalna itna bhi aasan nahin

kitne hi be-rahm shikari ghat lagae baiThe hain

aangan mein chiDiyon ka chahakna itna bhi aasan nahin

zaKHm hare ho hi jate hain chahe jitne jatan karo

udhDe zaKHm ka wapas silna itna bhi aasan nahin

panw chhalni ho jate hain kitne mausam kho jate hain

band gali se wapas muDna itna bhi aasan nahin

kaDi riyazat chahiye is mein mat samjho tum sahl ise

aaj ke daur mein insan hona itna bhi aasan nahin

kirchi-kirchi zat ka shisha por se chunna paDta hai

apne aap se roz ulajhna itna bhi aasan nahin

bahr-e-talab mein Dub ke ubhro raaz nihan tab khulta hai

ruh se dil ka rishta juDna itna bhi aasan nahin