ہجرت کر کے واپس آنا اتنا بھی آسان نہیں

ہجرت کر کے واپس آنا اتنا بھی آسان نہیں

روز بکھرنا روز سنورنا اتنا بھی آسان نہیں

تند ہوا میں دیے کا جلنا اتنا بھی آسان نہیں

قطرہ قطرہ روز پگھلنا اتنا بھی آسان نہیں

کتنے ہی بے رحم شکاری گھات لگائے بیٹھے ہیں

آنگن میں چڑیوں کا چہکنا اتنا بھی آسان نہیں

زخم ہرے ہو ہی جاتے ہیں چاہے جتنے جتن کرو

ادھڑے زخم کا واپس سلنا اتنا بھی آسان نہیں

پاؤں چھلنی ہو جاتے ہیں کتنے موسم کھو جاتے ہیں

بند گلی سے واپس مڑنا اتنا بھی آسان نہیں

کڑی ریاضت چاہیے اس میں مت سمجھو تم سہل اسے

آج کے دور میں انساں ہونا اتنا بھی آسان نہیں

کرچی کرچی ذات کا شیشہ پور سے چننا پڑتا ہے

اپنے آپ سے روز الجھنا اتنا بھی آسان نہیں

بحر طلب میں ڈوب کے ابھرو راز نہاں تب کھلتا ہے

روح سے دل کا رشتہ جڑنا اتنا بھی آسان نہیں