کافر کہوں حریف کہوں بے وفا کہوں

کافر کہوں حریف کہوں بے وفا کہوں

دلبر کہوں نگار کہوں دلربا کہوں

الفت میں اس صنم کو کیا کیا ہی دوں لقب

نازم کہوں دلم کہوں جانِ وفا کہوں

جلتی ہیں پریاں اس کے حسیں خد و خال سے

رشکِ پری اگر نہ کہوں تو میں کیا کہوں

میری غزل کے مصروں کی ہے جان بس وہی

جانِ غزل جو اس کو کہوں سو بجا کہوں

آ کر مرے مزار پہ اس نے یہی کہا

تجھ کو شہیدِ غم کہوں کشتِ جفا کہوں

کچھ کم نہیں ہے تیغ سے آنکھوں کی سرمگی

آفت کہوں عذاب کہوں یا بلا کہوں

اس کے رخِ حسین کی گر بات چل پڑے

مہوش کہوں میں ماہ کہوں مہ لقا کہوں

اپنی انا کے طیش میں وہ کر دے قتلِ عام

اس کی انا کو کیوں نہ میں عینِ قضا کہوں

غیض و جمال کا وہ حسیں امتزاج ہے

نیرنگیِ مزاج کو دو آتشہ کہوں

ہم دونوں میں دوئی کا ذرہ بھی نہیں گماں

پرتو یا عکس اپنا اسے آئینہ کہوں

سرخیِ لب کو دیکھ کے کہنے لگا یہ دل

یاقوت یا گلاب یا ان کے سوا کہوں

اس کے وجود سے تو ہے تازہ مری حیات

اپنی حیات میں اسے تازی ہوا کہوں

صوتِ جمیل کا جو کروں تذکرہ تو پھر

سرگم کہوں میں سُر کہوں بلبل نما کہوں

میرا وجود اس کی اداؤں پہ ہے نثار

جانِ ادا کہوں اسے نازِ ادا کہوں

روحم پہ مر مٹا ہے اثرؔ نام کا جو شخص

عاشق کہوں شہید کہوں مبتلا کہوں