نگاہیں کیوں ہیں نیچی یہ حیا کیا

نگاہیں کیوں ہیں نیچی یہ حیا کیا

سمجھتے ہو کسی کا مدعّا کیا

عبث کہتے ہیں وہ کیوں جان دیدی

مقدر سے بھی ہوتا ہے گلا کیا

وفاومہر کا جس پر یقیں تھا

اسی نے کیں جفائیں مجھ پہ کیا کیا

ہلالِ عید پر سایہ فگن ہے

کسی کا ناخنِ انگشت پاکیا

سلامت گردن وخنجر سلامت

لہو ملتے رہو، رنگِ حنا کیا

مُرادیں مانگنا ایسوں سے اے دل

معاذ اللہ بُت بھی ہیں خدا کیا

ذرا صبروتحمل سے بھی لو کام

نظرؔ آٹھوں پہر آہ وبکا کیا