KHat mein tahrir saf tha matlab

ḳhat meñ tahrīr saaf thā matlab

vo na samjhā magar mirā matlab

kar ga.ī kaam guftugū apnī

chaar bātoñ meñ khul gayā matlab

ho gayā ro.ab-e-husn qufl-e-dahan

lab tak apne na aa sakā matlab

tasfiya haañ nahīñ pe Thahrā hai

kis qadar sahl hai mirā matlab

naam lete na be-vafā.ī kā

tum samajhte agar mirā matlab

sar pe ehsān-e-guftugū na huā

ḳhāmushī ne adā kiyā matlab

guftugū qat.a maut ne kar dī

lījiye ḳhatm ho gayā matlab

mad.h saaqī kī hazrat-e-vā.iz

maiñ samajhtā huuñ aap kā matlab

kuchh na niklā zabān se 'mas.ūd'

dil kā dil hī meñ rah gayā matlab

KHat mein tahrir saf tha matlab

wo na samjha magar mera matlab

kar gai kaam guftugu apni

chaar baaton mein khul gaya matlab

ho gaya roab-e-husn qufl-e-dahan

lab tak apne na aa saka matlab

tasfiya han nahin pe Thahra hai

kis qadar sahl hai mera matlab

nam lete na be-wafai ka

tum samajhte agar mera matlab

sar pe ehsan-e-guftugu na hua

KHamushi ne ada kiya matlab

guftugu qata maut ne kar di

lijiye KHatm ho gaya matlab

madh saqi ki hazrat-e-waiz

main samajhta hun aap ka matlab

kuchh na nikla zaban se 'masud'

dil ka dil hi mein rah gaya matlab