خط میں تحریر صاف تھا مطلب

خط میں تحریر صاف تھا مطلب

وہ نہ سمجھا مگر مرا مطلب

کر گئی کام گفتگو اپنی

چار باتوں میں کھل گیا مطلب

ہو گیا رعب حسن قفل دہن

لب تک اپنے نہ آ سکا مطلب

تصفیہ ہاں نہیں پہ ٹھہرا ہے

کس قدر سہل ہے مرا مطلب

نام لیتے نہ ہے وفائی کا

تم سمجھتے اگر مرا مطلب

سر پہ احسان گفتگو نہ ہوا

خامشی نے ادا کیا مطلب

گفتگو قطع موت نے کر دی

لیجئے ختم ہو گیا مطلب

مدح ساقی کی حضرت واعظ

میں سمجھتا ہوں آپ کا مطلب

کچھ نہ نکلا زبان سے مسعودؔ

دل کا دل ہی میں رہ گیا مطلب