قتل عاشق کے لیے تدبیر پہلے اور تھی

قتل عاشق کے لیے تدبیر پہلے اور تھی

اب ادا ہے نازکی شمشیر پہلے اور تھی

پہلے خط میں یہ نہ لکھا تھا کہ ہم آنے کو ہیں

اب نیا مضمون ہے تحریر پہلے اور تھی

میری قسمت ہوگئی کیا اور اب ملتے نہیں

پہلے کیوں ملتے تھے کیا تقدیر پہلے اور تھی

عہد پیری میں کہاں وہ نوجوانی میں جوتھی

آفتابِ حسن میں تنویر پہلے اور تھی

پہلے ہم ان کے تھے اب وہ ہیں ہمارے شیفتہ

اور ہی صورت ہے اب تصویر پہلے اور تھی

قابلؔ اب تو درنشیں ہیں تھے کبھی پہلو نشیں

اور ہی غربت ہے اب توقیر پہلے اور تھی