کرتے ہو مجھ کو تیرجفا کا نشانہ کیا

کرتے ہو مجھ کو تیرجفا کا نشانہ کیا

اس کا بھی ڈر نہیں کہ کہے گا زمانہ کیا

دیکھا نہیں بھی ان کی جفائیں دیکھ لیں

دیکھیں اب اس کے بعد دکھائے زمانہ کیا

دل تو نہیں ہے ساتھ مگر درد دل ہے ساتھ

کرتا ہے غیر جو وہ کرے گا یگانہ کیا

ہر لفظ ایک دفتر بیداد دوست ہے

دشمن بھی سن سکیں گے ہمارا فسانہ کیا

وحشت سی ہو رہی ہے وفور بہار سے

ہمدم اٹھا چمن سے مرا آب ودانہ کیا

ذوق سجود پوچھ جبینِ نیاز سے

حیراں ہوں میں کہوں شرف آستانہ کیا

کس کی وفا کا ذکر ہے کس کی جفا کا ذکر

حیرت سے سن رہے ہو کسی کا فسانہ کیا

قدسیؔ ہوائے ہجر سے آتی ہے بوئے دوست

بستر لگا ہے آج سرِ آستانہ کیا