قدموں پہ تیرے دلنواز میرا سرِ نیاز ہو

قدموں پہ تیرے دلنواز میرا سرِ نیاز ہو

شام وسحر اسی طرح اپنی ادا نماز ہو

آنکھیں رہیں گہر فشاں دل خلش رہے نہاں

لب پہ ہو نالہ وفغاں روح میں بھی گداز ہو

آہوں کو ہنس کے ٹال دوں اشکوں کو روک روک لوں

اوروں کا ذکر کیا نہ دل سے بھی بیانِ راز ہو

چپکے پڑے ہیں سب کے سب دیکھیں قیامت آئے کب

دیر یہ کیوں ہے بے سبب محوِ خرام ناز ہو

حسن میں شانِ کبر ہو عشق میں شانِ عاجزی

ناز وغرور ہو اُدھر اور اِدھر نیاز ہو

پھیرو نہ نامراد یوں آس نہ توڑو اس طرح

دور سے سن کے آئے ہیں ہم کہ گدا نواز ہو

اے غمِ عشق ! داغ سے سینہ ہے اپنا لالہ زار

تیرے ہی دم سے ہے بہار عمر تری دراز ہو

نجم تمہیں ملے گا کیا ایسی نمازِ عشق میں

دل میں خلش ہو اور نہ درد سوز ہو اور نہ ساز ہو