عشق کی راہ میں ایسے بھی مقام آئے ہیں

عشق کی راہ میں ایسے بھی مقام آئے ہیں

تھک کے بیٹھے ہیں تو منزل کے سلام آئے ہیں

کل یہی لوگ نہ دنیا کو مٹا دیں تو سہی

لیکے جو زندہ وتابندہ نظام آئے ہیں

ان کے دامن پہ ٹپکنے کا ملا ہے اعزاز

ہائے کس وقت یہ آنسو مرے کام آئے ہیں

دل میں اک آگ لگا دیں گے یہ دلکش تارے

جگمگاتے جو فلک پر سرشام آئے ہیں

تیری نظروں سے ہم اربابِ محبت کے لئے

جب بھی آئے ہیں محبت کے پیام آئے ہیں

سوئے میخانہ کچھ اس شان سے آئے ہیں شمیمؔ

جیسے میخانے میں رندوں کے امام آئے ہیں