دیروحرم میں جلوۂ جانانہ ایک ہے

دیروحرم میں جلوۂ جانانہ ایک ہے

پردہ اٹھے تو کعبہ و بت خانہ ایک ہے

بزم ازل کا نعرۂ مستانہ ایک ہے

کیف وسرور ایک ہے پیمانہ ایک ہے

راہ طلب میں بیخود فرزانہ ایک ہے

سب کا طریقِ عشق میں میخانہ ایک ہے

کعبہ کا رتبۂ عظمت بت خانہ ایک ہے

دونوں گھروں میں جلوۂ جانانہ ایک ہے

ہیں حسن وعشق باعثِ آرائش جہاں

اک شمع انجمن ہے تو پروانہ ایک ہے

جلوہ اسی کا دیکھ رہی ہے نگاہِ شوق

میری نظر میں کعبہ و بت خانہ ایک ہے

نورِ جمال یار تجلی ہے طور کی

عنواں جدا سہی مگر افسانہ ایک ہے

بیخود بقدر ذوق ہیں سب چشمِ مست سے

بادہ کشان عشق کا پیمانہ ایک ہے

ہے جستجوئے یارمیں زاہد بھی رند بھی

اک رازدار حسن ہے بیگانہ ایک ہے

ہیں شیخ وبرہمن سبب تفرقہ شمیمؔ

ورنہ فضائے کعبہ وبتخانہ ایک ہے