پیرِ مغاں کی مجھ سے حقیقت نہ پوچھئے

پیرِ مغاں کی مجھ سے حقیقت نہ پوچھئے

شیخِ حرم سے کیوں ہے عقیدت نہ پوچھئے

خاک اڑ رہی ہے میکدہ ہائے زمانہ میں

مستی بھری نظر کی کرامت نہ پوچھئے

ان کی نوازشوں سے بھی گھبرا رہا ہوں میں

دیوانگیٔ جوش محبت نہ پوچھئے

کیف زبوں نہیں منت کشِ زباں

صورت کو دیکھئے مری حالت نہ پوچھئے

تمہید ہے کسی ستم تازہ کی ضرور

کیوں ہو رہی ہے ان کی عنایت نہ پوچھئے

لفظوں کی دسترس سے ہے اونچا مقامِ عشق

بے چارگیٔ زور فصاحت نہ پوچھئے

کس سادگی سے حشر میں کہتے ہیں وہ طفیلؔ

دنیا کی بات روزِ قیامت نہ پوچھئے