kaun albela ramta-jogi rup-nagar mein aaya hai

kaun albelā ramtā-jogī rūp-nagar meñ aayā hai

darshan jal kī pyaas baḌhī hai jis ne darshan paayā hai

ruup anuup hai us kā aalī matvāle matvāle nain

chandā aisā mukhḌā us kā raam ne aap banāyā hai

añg-añg se mastī barse nainoñ se ras kī būñdeñ

kis bairan ne joban rut meñ us kā chain uḌāyā hai

ghuñghaT ghuñghaT chandā chamke āñgan āñgan phuul khile

rūp-nagar kī jin galiyoñ meñ us ne alakh jagāyā hai

kunj kunj meñ us kī bāteñ panghaT panghaT us kī yaad

rūp-nagar meñ us jogī ke ruup ne rañg jamāyā hai

ik ik man meñ huuk uThā.e us kī bansī kā sañgīt

kis sajnī kā sājan hai vo kis maatā kā jaayā hai

koī na samjhe koī na jaane us ke dukhiyā man kā rog

aisā lagtā hai maaTī meñ us ne la.al gañvāyā hai

koī na pūchhe us jogī se jogī man kī baat batā

kis ke kāran jog liyā hai kyuuñ jag ko Thukrāyā hai

kaun albela ramta-jogi rup-nagar mein aaya hai

darshan jal ki pyas baDhi hai jis ne darshan paya hai

rup anup hai us ka aali matwale matwale nain

chanda aisa mukhDa us ka ram ne aap banaya hai

ang-ang se masti barse nainon se ras ki bunden

kis bairan ne joban rut mein us ka chain uDaya hai

ghunghaT ghunghaT chanda chamke aangan aangan phul khile

rup-nagar ki jin galiyon mein us ne alakh jagaya hai

kunj kunj mein us ki baaten panghaT panghaT us ki yaad

rup-nagar mein us jogi ke rup ne rang jamaya hai

ek ek man mein huk uThae us ki bansi ka sangit

kis sajni ka sajan hai wo kis mata ka jaya hai

koi na samjhe koi na jaane us ke dukhiya man ka rog

aisa lagta hai maTi mein us ne lal ganwaya hai

koi na puchhe us jogi se jogi man ki baat bata

kis ke karan jog liya hai kyun jag ko Thukraya hai