tumhaare aastan se jis ko nisbat hoti jati hai

tumhāre āstāñ se jis ko nisbat hotī jaatī hai

use hāsil zamāne-bhar kī rif.at hotī jaatī hai

kuchh is andāz se un kī ināyat hotī jaatī hai

tamāshā-gāh-e-ālam merī sūrat hotī jaatī hai

tumhāre husn ke jalve nigāhoñ meñ samā.e haiñ

hamārī zindagī tasvīr-e-hairat hotī jaatī hai

tumhārī yaad ne vo raushnī baḳhshī hai ashkoñ ko

ki un se mere ġham-ḳhāne kī zīnat hotī jaatī hai

razā-e-dost kī phir manzileñ āsān hotī haiñ

nazar jab vāqif-e-rāz-e-mashiyyat hotī jaatī hai

vo jab sāġhar pilānā chāhte haiñ chashm-e-mai-gūñ se

to phir har ek par un kī ināyat hotī jaatī hai

mere zauq-e-tamannā kī haqīqat pūchhte kyā ho

unheñ bhī ab to kuchh mujh se mohabbat hotī jaatī hai

merī hastī hai ā.īna tere ruḳh kī tajallī kā

zamāne par ayaañ terī haqīqat hotī jaatī hai

usī kā naam shāyad ishq kī me.arāj hai 'sādiq'

mere ġham kī kahānī vaj.h-e-shohrat hotī jaatī hai

tumhaare aastan se jis ko nisbat hoti jati hai

use hasil zamane-bhar ki rifat hoti jati hai

kuchh is andaz se un ki inayat hoti jati hai

tamasha-gah-e-alam meri surat hoti jati hai

tumhaare husn ke jalwe nigahon mein samae hain

hamari zindagi taswir-e-hairat hoti jati hai

tumhaari yaad ne wo raushni baKHshi hai ashkon ko

ki un se mere gham-KHane ki zinat hoti jati hai

raza-e-dost ki phir manzilen aasan hoti hain

nazar jab waqif-e-raaz-e-mashiyyat hoti jati hai

wo jab saghar pilana chahte hain chashm-e-mai-gun se

to phir har ek par un ki inayat hoti jati hai

mere zauq-e-tamanna ki haqiqat puchhte kya ho

unhen bhi ab to kuchh mujh se mohabbat hoti jati hai

meri hasti hai aaina tere ruKH ki tajalli ka

zamane par ayan teri haqiqat hoti jati hai

usi ka nam shayad ishq ki mearaj hai 'sadiq'

mere gham ki kahani wajh-e-shohrat hoti jati hai