مجنوں ہوں نہ وحشی ہوں نہ دیوانہ ہوا ہوں

مجنوں ہوں نہ وحشی ہوں نہ دیوانہ ہوا ہوں

تیری نگہ مست کا مستانہ ہوا ہوں

سنتا ہوں کہ وہ کرتا ہے اس گھر میں خدائی

بے وجہ نہیں ساکنِ بت خانہ ہوا ہوں

کافر ہوں نہ مومن ہوں نہ ہندو نہ مسلماں

کچھ ہوں تو کہوں بندۂ جانانہ ہوا ہوں

گھر بیٹھے مجھے یار نے سرشار کیا ہے

مخمور میں بے بادۂ و پیمانہ ہوا ہوں

مظہر میں ظہور اپنا ہے اظہار سے پہلے

ظاہر ہے کہ با جلوۂ جانانہ ہوا ہوں

عرفان کسی کا مجھے کچھ ہو تو بتاؤں

جز آپ کے میں آپ سے بیگانہ ہوا ہوں

اے خاک نشیں پوچھو حقیقت کو نہ میری

وہ کنج ہوں آباد وہ ویرانہ ہوا ہوں