ہر رنگ میں دل والۂ و دیوانہ ہے اس کا

ہر رنگ میں دل والۂ و دیوانہ ہے اس کا

ہے شمع کہیں اور کہیں پروانہ ہے اس کا

اس کا جو یگانہ ہے یگانہ ہے جہاں کا

بیگانۂ عالم ہے جو بیگانہ ہے اس کا

وہ کون ہے جو اس کی محبت سے ہے خالی

مشتاق ہر ایک عاقل و فرزانہ ہے اس کا

دنیا میں ہے ایک ایک حسیں سجدہ کے قابل

یہ عالمِ ہستی ہے کہ بت خانہ ہے اس کا

اس جان پر مرتا ہوں جو ہے یار پہ قرباں

اُس دل پہ ہوں شیدا کہ جو دیوانہ ہے اس کا

غم ہو کہ خوشی ہو مجھے دونوں ہیں برابر

ہر حال میں یاں سجدۂ شکرانہ ہے اس کا

ہے انجمنِ دہر اسی شمع سے روشن

خورشیدِ جہاں تاب بھی پروانہ ہے اس کا

آتا ہے یہاں جو وہی ہوجاتا ہے غافل

گویا یہ جہاں بھی کوئی میخانہ ہے اس کا

ویرانہ جہاں ہے وہیں عاشق بھی ہیں بستے

معمورہ جسے کہتے ہیں ویرانہ ہے اس کا

مجبورؔ سا اس دہر میں رسوا نہیں کوئی

سنتے ہیں جہاں ہم وہیں افسانہ ہے اس کا