wo shai ki log jise aaftab kahte hain

vo shai ki log jise āftāb kahte haiñ

ham us ko apnī nazar kā shabāb kahte haiñ

har ik adā ko tirī lā-javāb kahte haiñ

sitam ko bhī karam-e-be-hisāb kahte haiñ

har ik shai meñ hai ābād husn kī duniyā

har ik zarre ko ham āftāb kahte haiñ

tah-e-naqāb nahīñ vo tajallī-e-zebā

ham apne zof-e-basar ko naqāb kahte haiñ

urūs-e-dahr kī hai ik hasīn sī karvaT

jahāñ vaale jise inqalāb kahte haiñ

faroġh de ke use bahr-e-be-karāñ kar do

vo zindagī jise habāb kahte haiñ

ye terī chashm-e-ḳhumār-ālūd-o-hayā-ālūd

jo mujh se pūchho is ko sharāb kahte haiñ

shabāb-e-ishq kā mere vo ek partav hai

vo apne husn kā jis ko shabāb kahte haiñ

kuchh aur chāhiye mizrāb-e-zindagī ke liye

udaas udaas sā hai ye rabāb kahte haiñ

har ik savāl par ulTā savāl hotā hai

tire javāb ko ham lā-javāb kahte haiñ

talāsh kar le jo kasrat meñ husn-e-vahdat ko

usī nigāh ko ham kāmyāb kahte haiñ

sukūn-e-jism ho jis meñ sukūn-e-rūh na ho

ham us sukūñ ko ik iztirāb kahte haiñ

vahī hai raag jise dil kā saaz bhī gaa.e

rabāb-e-dil ko ham asl rabāb kahte haiñ

vo apne husn pe nāzāñ to apne ishq pe ham

ham apne-āp ko un kā javāb kahte haiñ

har ek juzv hai ā.īna vus.at-e-kul kā

har ek harf ko ham ek kitāb kahte haiñ

shuā-e-husn daraḳhshāñ nahīñ naqāb se kam

vo apne husn ko kyuuñ be-naqāb kahte haiñ

ye zindagī ki hai rahmat tirī rifāqat meñ

tire baġhair ham us ko azaab kahte haiñ

masarrateñ bhī haiñ ai 'barq' ġham kā ā.īna

sukūn ko bhī to ham iztirāb kahte haiñ

wo shai ki log jise aaftab kahte hain

hum us ko apni nazar ka shabab kahte hain

har ek ada ko teri la-jawab kahte hain

sitam ko bhi karam-e-be-hisab kahte hain

har ek shai mein hai aabaad husn ki duniya

har ek zarre ko hum aaftab kahte hain

tah-e-naqab nahin wo tajalli-e-zeba

hum apne zof-e-basar ko naqab kahte hain

urus-e-dahr ki hai ek hasin si karwaT

jahan wale jise inqalab kahte hain

farogh de ke use bahr-e-be-karan kar do

wo zindagi jise habab kahte hain

ye teri chashm-e-KHumar-alud-o-haya-alud

jo mujh se puchho is ko sharab kahte hain

shabab-e-ishq ka mere wo ek partaw hai

wo apne husn ka jis ko shabab kahte hain

kuchh aur chahiye mizrab-e-zindagi ke liye

udas udas sa hai ye rabab kahte hain

har ek sawal par ulTa sawal hota hai

tere jawab ko hum la-jawab kahte hain

talash kar le jo kasrat mein husn-e-wahdat ko

usi nigah ko hum kaamyab kahte hain

sukun-e-jism ho jis mein sukun-e-ruh na ho

hum us sukun ko ek iztirab kahte hain

wahi hai rag jise dil ka saz bhi gae

rabab-e-dil ko hum asl rabab kahte hain

wo apne husn pe nazan to apne ishq pe hum

hum apne-ap ko un ka jawab kahte hain

har ek juzw hai aaina wusat-e-kul ka

har ek harf ko hum ek kitab kahte hain

shua-e-husn daraKHshan nahin naqab se kam

wo apne husn ko kyun be-naqab kahte hain

ye zindagi ki hai rahmat teri rifaqat mein

tere baghair hum us ko azab kahte hain

masarraten bhi hain ai 'barq' gham ka aaina

sukun ko bhi to hum iztirab kahte hain