وہ شے کہ لوگ جسے آفتاب کہتے ہیں

وہ شے کہ لوگ جسے آفتاب کہتے ہیں

ہم اس کو اپنی نظر کا شباب کہتے ہیں

ہر اک ادا کو تری لا جواب کہتے ہیں

ستم کو بھی کرم بے حساب کہتے ہیں

ہر اک شے میں ہے آباد حسن کی دنیا

ہر اک ذرے کو ہم آفتاب کہتے ہیں

تہ نقاب نہیں وہ تجلیٔ زیبا

ہم اپنے ضعف بصر کو نقاب کہتے ہیں

عروس دہر کی ہے اک حسین سی کروٹ

جہاں والے جسے انقلاب کہتے ہیں

فروغ دے کے اسے بحر بیکراں کر دو

وہ زندگی جسے حباب کہتے ہیں

یہ تیری چشم خمار آلود و حیا آلود

جو مجھ سے پوچھو اس کو شراب کہتے ہیں

شباب عشق کا میرے وہ ایک پرتو ہے

وہ اپنے حسن کا جس کو شباب کہتے ہیں

کچھ اور چاہیے مضراب زندگی کے لئے

اداس اداس سا ہے یہ رباب کہتے ہیں

ہر اک سوال پر الٹا سوال ہوتا ہے

ترے جواب کو ہم لا جواب کہتے ہیں

تلاش کر لے جو کثرت میں حسن وحدت کو

اسی نگاہ کو ہم کامیاب کہتے ہیں

سکون جسم ہو جس میں سکون روح نہ ہو

ہم اس سکوں کو اک اضطراب کہتے ہیں

وہی ہے راگ جسے دل کا ساز بھی گائے

رباب دل کو ہم اصل رباب کہتے ہیں

وہ اپنے حسن پہ نازاں تو اپنے عشق پہ ہم

ہم اپنے آپ کو ان کا جواب کہتے ہیں

ہر ایک جزو ہے آئینہ وسعت کل کا

ہر ایک حرف کو ہم ایک کتاب کہتے ہیں

شعاع حسن درخشاں نہیں نقاب سے کم

وہ اپنے حسن کو کیوں بے نقاب کہتے ہیں

یہ زندگی کہ ہے رحمت تری رفاقت میں

ترے بغیر ہم اس کو عذاب کہتے ہیں

مسرتیں بھی ہیں اے برقؔ غم کا آئینہ

سکون کو بھی تو ہم اضطراب کہتے ہیں