پلک جھپکی نہ وقت مرگ تک ایامِ فرقت میں

پلک جھپکی نہ وقت مرگ تک ایامِ فرقت میں

لپٹ کر جو خیالِ یار سے تربت میں سونا تھا

نہ پوچھو مہلت ہستی کا وقت مرگ افسانہ

اسی دھوکے میں آکر زندگی کا وقت کھونا تھا

کچھ ایسی عمر بھر غفلت میں گزری زندگی اپنی

جو دیکھا غور سے تو جاگنا بھی اپنا سونا تھا

محبت دل میں جب ہوتی ہے انساں کیا نہیں کرتا

شکایت کی فقط ایک بات ہے آزردہ ہونا تھا

ذرا سے رنج پر تم کوئے جاناں سے چلے آئے

وحیدؔ ان سے قیامت تک جدا تم کو نہ ہونا تھا