دکھلا رہے ہو لطف بہار و خزاں تمہیں

دکھلا رہے ہو لطف بہار و خزاں تمہیں

گل ہو تمہیں چمن ہو تمہیں باغباں تمہیں

آنکھوں میں مثل رنگ چمن ہو عیاں تمہیں

دل میں ہو بوئے گل کی طرح سے نہاں تمہیں

کیسا حجاب کہتے ہیں دنیا میں کس کو حسن

در پردہ لے رہے ہو مرا امتحاں تمہیں

جس سے تمہارے نام کو سنتے ہیں ہر گھڑی

گویا ہو اس دہن میں برنگ زباں تمہیں

دیر و حرم بھرے ہیں تمہارے ہی ذکر سے

دونوں جگہ ہو باعثِ شورو فغاں تمہیں

دریائے غم میں ڈوبنے دو گے کسی کو کب

ہونا خدائے کشتیٔ بے بادباں تمہیں

کس سے کہوں تمہارے سوا اپنے دل کی بات

میرے تو ہو انیس تمہیں راز داں تمہیں

ہم جانتے ہیں صفحۂ ہستی سے رات دن

ہر ایک کا مٹاتے ہو نام و نشاں تمہیں

اب جسم و جاں کو بھی نہیں پہچانتا وحیدؔ

رہتے ہو اس کے جسم میں مانندِ جاں تمہیں