زندگی کی راہ میں یوں بے خبر ہیں دل سے ہم

زندگی کی راہ میں یوں بے خبر ہیں دل سے ہم

جیسے آگے بڑھ گئے ہوں عشق کی منزل سے ہم

کچھ تری رنگیں نگاہیں، کچھ ترے حرفِ وفا

جانے کیا کچھ لے کے اٹھے ہیں، تری محفل سے ہم

جانتے ہیں سعی لاحاصل ہے ان کی جستجو

پھر بھی باز آتے نہیں ہیں سعی لاحاصل سے ہم

جس سے ڈرتے تھے وہی نکلا نتیجہ عشق کا

پھونک بیٹھے خرمنِ ہستی کو سوزِ دل سے ہم

آج پھر نظروں میں ہے تاباں جمال روئے دوست

آج پھر آنکھیں ملاتے ہیں، مہِ کامل سے ہم

کانپتے جملے، الجھتی سانسیں، گھبراتی نظر

کہہ سکے دل کی تمنا وجدؔ کس مشکل سے ہم